一注獨羸渣宏基 (吹水唔抺嘴之作)

《生果日報吹水作大模式啓動》

今日收市後，忽然收到網上認識的某國內大炒家來電：「偉哥，呢兩個月做乜咁失策啊，隻龍傑沽完貨就升到上天；你自己寫完盈大，又唔渣耐d，轉個頭又沽出，而家升左成倍啦；仲有隻1884，成班人跟你尋日沽出，比莊家收晒貨，一野就掃上去，你真係隻隻都捉到鹿唔識脫角啊，益晒我地班炒家。」

我：「唉，我都唔想架，不過數就係咁計，到價沽出，點知你地班炒家會炒到咁癲」

大炒家：「以前個d唔好講啦，冇話我唔提你，你手上隻宏基都係好野來，唔好又晨咁早沽貨」

我：「我知好野來，今年6月公佈業績，會有賣宏基資本大廈的盈利入帳，到時可望有約4億盈利入帳，如果公司派一半盈利做特別股息，每股都有4毫子息收。仲有，賣宏基資本大廈的現金入帳後，公司將有淨現金超過5.5億元、資產淨值約13億元，財政好穩健。而且公司而家業務分散，除左搞地產、仲有搞基金、教育項目，如果第日唔想再搞落去，想賣出去應該都好易搵到買家。而家靚殼值4億元，加埋資產淨值13億元，目標市值如果睇17億元，每股就值3.5元，咁計有冇錯？」

大炒家：「咁計就差唔多，但公司仲有幾個賣點你都冇為意：

1. 你有冇留意公司大股東背景，陳公子個老豆陳漢強話晒都係澳門酒店及賭業大亨，以前係賭廳廳主，跟楊生搵食，而家持有澳門華都酒店。你睇宏基以前的裝修業務，有好多澳門的生意就係咁解。他日兩父子聯手搵d澳門賭廳項目注入來，谷大間上市公司話都無咁易，唔好話17億市值、炒到30億市值都唔過份。

2. 陳公子都係叻仔，宏基資本大廈呢個項目賺左幾個億，而家仲有大把資金分散投資唔同項目。佢入股左《喜洋洋》創辦人蘇永樂個檔"永樂創新教育"，隨時會變成一個金礦。家下阿里、騰訊都爭住搞網上教育，永樂創新教育比人行早一步，一早就開發用apps來學習，如果成功推廣到全國，成為全國幼兒教育的第一品牌，你話值幾錢？」

聽完我都傻左，咁都比佢諗到，難怪佢做到大炒家，我仲係小散戶。

對話到尾聲，我膽粗粗問大炒家隻宏基應該幾錢落車好，佢靜靜雞話我知：「第日如果升到3元，你就沽一半攞返個本金先，剩下個一半零成本就留低放紙鳶。」


以上對話純屬虛構，信者無得救！
以上對話純屬虛構，信者無得救！
以上對話純屬虛構，信者無得救！ 

但所有數據無作大。

參考資料：

澳門娛樂博彩中介人協會成立

永樂創新教育 

喜洋洋之父蘇永樂訪問視頻